ӨДӨР ТУТМЫН МЭДЭЭ-ний гол тойм – 2026 оны наймдугаар сарын 16

Ирак улс АНУ тэргүүтэй эвслийн ISIS [Ирак, Сирийн Исламын улс]-ын эсрэг ажиллагааг дуусгах эцсийн хугацааг дахин баталсны дараа АНУ-ын арми үлдсэн цэргээ 2026 оны 9-р сарын 30 гэхэд Иракаас гаргаж, 2003 оны довтолгооноос эхэлсэн оролцоогоо дуусгавар болгоно. Иракийн ерөнхий сайд Али аль-Заиди 10-р сарын 1-нээс Ирак улс гадаадын цэргийн оролцоогүйгээр үйл ажиллагаагаа явуулж эхэлнэ гэж мэдэгджээ. Харин АНУ, Иракийн харилцаа эдийн засаг, хөгжил, аюулгүй байдлын хамтын ажиллагаанд төвлөрөх төлөвтэй байна. (Фокс Ньюс)

ОХУ-ын ерөнхийлөгч Владимир Путин 8-р сарын 12-нд Европын орнууд Оросын худалдааны хөлөг онгоцнуудыг хурааж эхэлбэл Орос улс Европын хөлгүүдийн эсрэг ижил арга хэмжээ авч, шаардлагатай гэж үзсэн газартаа хэрэгжүүлж болзошгүй гэж анхааруулжээ. Европын Холбоо Оросын “сүүдрийн флот”-д хориг арга хэмжээ авах, хөлөг саатуулах, шалгах замаар дарамтаа нэмэгдүүлж буй энэ үед тэрээр ийнхүү мэдэгдсэн бол Оросын Номхон далайн флотын командлагч Оросын хүчин Москвагийн “дайсагнагч улс” гэж нэрлэдэг орнуудтай холбоотой хөлгүүдийг шалгаж, саатуулахад бэлэн гэж мэдэгджээ. (Ройтерс)

2022 онд Орос улсад баривчлагдаж, улмаар эрүүгийн хэргээр хоригдсон АНУ-ын Тэнгисийн явган цэргийн ахмад дайчин Роберт Гилман дөрвөн жил орчим ял эдэлж, эрүүл мэнд нь ноцтой муудсаны дараа хүмүүнлэгийн үндэслэлээр суллагджээ. АНУ-ын Ерөнхийлөгч Дональд Трампын засаг захиргаа оролцсон хэлэлцээрийн дараа ОХУ-ын ерөнхийлөгч Владимир Путин түүнд өршөөл үзүүлсэн бөгөөд АНУ-ын албаныхан хоригдол солилцоогүй гэж мэдэгджээ. (Дэйли Мэйл)

Украин (Урейн)-ы ерөнхийлөгч Володимир Зеленський 8-р сарын 11-нд Украин (Урейн) улс Оросын дайныг зогсоох тодорхой саналуудыг АНУ-д өгсөн ч агуулгыг нь задруулаагүй гэж мэдэгджээ. Тэрээр дипломат ажиллагааг Украин (Урейн)-ы батлан хамгаалах чадавхыг бэхжүүлэх, ялангуяа агаарын довтолгооноос хамгаалах нэмэлт тусламж үзүүлэх, мөн дайныг сунгах бус дуусгахад чиглүүлэхийн тулд АНУ-аас Орос улсад үзүүлэх дарамтыг нэмэгдүүлэх замаар дэмжих ёстой гэжээ. Украин (Урейн) улс хэлэлцээ хийх, болзолгүй гал зогсооход бэлэн хэвээр байгаа ч аливаа энхийн гэрээнд найдвартай аюулгүй байдлын баталгаа тусгах ёстой гэж үзэж байна. (Киев Пост)

Ерөнхийлөгч Володимир Зеленський 8-р сарын 12-нд Украин (Урейн)-ы хүчин 1-р сарын сүүлээр сөрөг довтолгоо эхлүүлснээс хойш [Украин (Урейн)-ы] Олександривкагийн чиглэлд 745 хавтгай дөрвөлжин километр газар нутаг, 26 тосгоныг чөлөөлсөн гэж мэдэгджээ. Гэвч Украин (Урейн)-ы газрын зургийн судалгааны бүлэг Deep State-ийн хамгийн сүүлийн мэдээллээр 260 орчим хавтгай дөрвөлжин километр нутгийг чөлөөлж, 18 тосгоныг эргүүлэн авсан бөгөөд Оросын цэргийг өөр 6 тосгоноос шахан гаргасныг харуулжээ. Энэ нь тулаан болж буй бүсэд газар нутгийн хяналтыг нарийн хэмжихэд бэрх болохыг харуулж байна. (Киев Индепендент)

Энэтхэг улс Хятад улстай маргаантай хил дагуу гарсан аливаа зөрчил нь ноцтой асуудал бөгөөд хоёр улсын өргөн хүрээний харилцаанд нөлөөлнө гэж мэдэгдсэн байна. Энэ нь цэргийн шинэ сөргөлдөөн гарсан гэж мэдээлэгдэж буй үед гарчээ. Энэтхэгийн Гадаад хэргийн яамны мэдээлснээр, үл ойлголцол, буруу тооцооллоос сэргийлэхийн тулд хоёр тал дипломат болон цэргийн сувгийг үргэлжлүүлэн ашиглахаар тохиролцсон бол хоёр талын харилцааг сайжруулахад хилийн энх тайван, тогтвортой байдал нэн чухал гэдгийг онцолжээ. (Жапан Таймс)

Оросын холбооны төсөв 6-р сард ашигтай гарсны дараа 7-р сард 8.8 тэрбум ам.долларын алдагдал хүлээлээ. 2026 оны эхний 7 сарын нийт алдагдал 6.5 их наяд рубль (78.7 тэрбум ам.доллар)-т хүрч, ДНБ [дотоодын нийт бүтээгдэхүүн]-ий 2.8%-тай тэнцсэн байна. Украин (Урейн)-ы дайны улмаас засгийн газрын зардал огцом өссөөр байна. (RBC-Украин)

ЮНЕСКО [Нэгдсэн Үндэстний Байгууллагын Боловсрол, шинжлэх ухаан, соёлын байгууллага]-ын мэдээлснээр, Талибан 2021 онд засгийн эрхэнд эргэн ирснээсээ хойш 2.4 сая орчим афган охиныг дунд боловсрол эзэмшихийг хоригложээ. Ингэснээр Афганистан улс охид, эмэгтэйчүүдэд дунд, дээд боловсрол эзэмшихийг албан ёсоор хориглосон дэлхийн цорын ганц улс болжээ. Тус байгууллага эдгээр хязгаарлалт 2066 он гэхэд 600,000 эмэгтэйг хөдөлмөрийн зах зээлээс шахаж, нийт 9.6 тэрбум ам.долларын орлогын алдагдал учруулан, эрт гэрлэх эрсдэлийг нэмэгдүүлж, 2030 он гэхэд Афганистанд 11,000 гаруй мэргэшсэн эмэгтэй багш дутагдахад хүргэж болзошгүйг анхааруулжээ. (Ройтерс)

Бүгд Найрамдах Ардчилсан Конго Улс [БНАКУ]-ын зүүн хэсэгт дэгдсэн Эбола өвчний батлагдсан 4,381 тохиолдлоос дор хаяж 2,011 хүн нас баржээ. Энэ нь түүхэн дэх хамгийн хурдацтай тархсан, цар хүрээгээрээ хоёрдугаарт орох Эболагийн дэгдэлт болжээ. Хоёрдугаар сард эхэлж, 5-р сарын 15-нд албан ёсоор зарласан уг дэгдэлт зүүн нутгийн 5 мужид тархаж, нас баралтын түвшин 45.9%-д хүрчээ. Мөргөлдөөн, замын тааруу байдал, мэдээлэл хоцрох, ажиллах хүчний тасалдал уг хариу арга хэмжээнд саад болж байна. Уг өвчнийг үүсгэж буй ховор Бундибугё омгийн эсрэг батлагдсан вакцин, эмчилгээ байхгүй ч [БНАКУ-ын] Итури мужид эмнэл зүйн туршилт явуулж байна. (AP Ньюс)

Nutrients сэтгүүлд нийтлэгдсэн, элэг өөхлөх өвчтэй, насанд хүрсэн 79 хүнийг хамруулсан санамсаргүй түүвэрт судалгаагаар 6 долоо хоногийн турш өдөр бүр 200 грамм шинэ улаан лооль, 50 грамм улаан лоолийн сүмс хэрэглэхэд жин, бүсэлхийн тойрог, биеийн өөхний хэмжээ мэдэгдэхүйц өөрчлөгдөөгүй ч элэгний өөхний хэмжээг мэс ажилбаргүйгээр хэмждэг үзүүлэлт эрс буурчээ. Ликопин болон улаан лоолийн бусад нэгдэл үүнд нөлөөлсөн байж болох ч илүү өргөн хүрээтэй, урт хугацааны судалгаа шаардлагатай гэж судлаачид үзсэн байна. (ВьетнамНет)

Энэтхэгийн чих, хамар, хоолойн эмч, доктор Рохит Удая Прасад чихний хэнгэрэгт ойр байрлах чихэвчний өндөр децибелийн дуу нөхөн төлждөггүй үслэг эсүүдийг устгаж, удаан хугацаагаар зүүх нь хулхи хуримтлагдах, чих үрэвсэхэд хүргэж болзошгүйг анхааруулжээ. Эрүүл мэндийн мэргэжилтнүүд дууны түвшнийг 60%-иас доош байлгаж, нэг удаагийн хэрэглээг 60 минутаар хязгаарлах “60/60” дүрмийг мөрдөхийг зөвлөж байна. Дуу чимээ дарах чихэвч хэрэглэж, ойр ойрхон завсарлаж, чихний жижиг чихэвчтэй унтахаас зайлсхийж, утасны дууны түвшний анхааруулгыг хянах хэрэгтэй. Хүүхэдтэй болон чимээ ихтэй орчинд ажилладаг хүмүүс, сонсголын эмгэгтэй хүмүүс онцгой болгоомжлох хэрэгтэй. (Тань Ньень)

Гарал үүсэл нь тодорхойгүй, хольцтой, эсвэл бохирдсон ургамлын гаралтай бүтээгдэхүүнд шошгод дурдаагүй стероид, хүнд металл, эм болон бусад хорт бодис агуулагдаж, элэг, бөөр, ходоод гэдсэнд ноцтой асуудал үүсгэж болзошгүй. Шарлах, шээс бараантах, хэвлий хүчтэй өвдөх, хавагнах, хэт ядрах зэрэг шинж илэрвэл яаралтай эмнэлгийн тусламж авах шаардлагатай. Эмнэлгийн үнэлгээнд хэрэг болж болзошгүй тул бүтээгдэхүүн, сав баглаа боодлыг хадгалж, “шууд эдгээнэ”, эсвэл “гаж нөлөөгүй” гэж амласан бүтээгдэхүүнээс зайлсхийх хэрэгтэй. (Тань Ньень)

Дельфин хар салхины үлдсэн хэсгийн улмаас 8-р сарын 12-нд Бээжин болон Хятадын төв, зүүн хэсэгт аадар бороо орж, замууд үерт автан, тээврийн хөдөлгөөн саатжээ. Бээжин хотод 250 автобусны чиглэлийг түр зогсоож, аялал жуулчлалын 150 газрыг хаасан бөгөөд цагт 90.7 мм хур тунадас бүртгэгджээ. Төв болон зүүн нутгийн мужуудад хур тунадас шинэ дээд хэмжээнд хүрчээ. (Ройтерс)

8-р сарын 11-нд АНУ-д урьдчилсан байдлаар деречо [хүчтэй аадар борооны түргэн шилжих зурвасыг дагалддаг, өргөн хүрээг хамарсан удаан үргэлжлэх салхи] Айова мужаас Иллинойс мужийн хойд хэсгийг дайран, Индиана мужийн хойд хэсэгт хүрчээ. Үүний улмаас Айова мужид EF1 зэрэглэлийн 3, Чикагогийн орчимд 3, нийт 6 хар салхи батлагджээ. Индиана мужийн Гэри хотод салхины хурд цагт 160 километрт хүрч, Иллинойс, Индиана мужуудад нийтийн үйлчилгээний 600,000 гаруй хэрэглэгч цахилгаангүй болжээ. (Уотчерс)

Хоригт орж, эрэгт суусан Caroline Bezengi танкераас алдагдсан газрын тос далайн тусгай хамгаалалттай бүс бүхий [Оманы] Кабилия арлын эргээс тархаж, Рас Мадракагийн эх газрын наран шарлагын газруудад хүрчээ. Оросын “сүүдрийн флот”-ын нэг хэсэг гэж үздэг уг хөлөг 6-р сард дэлбэрэлт болсон тухай мэдээлэх үедээ Оросын бараг 1 сая баррель түүхий газрын тос тээвэрлэж байжээ. (Вашингтон Таймс)

[Францын] Гравлины атомын цахилгаан станцын хөргөлтийн ус сорох системд аварга медуз-ардын сүрэг бөглөх аюул учруулсны улмаас 8-р сарын 10-нд гурван реакторыг зогсоож, өөр нэг реакторын хүчин чадлыг урьдчилан сэргийлэх үүднээс тал хувьд нь хүргэж бууруулжээ. (Дэйли Мэйл)

Их Британийн Засгийн газар 8-р сарын 10-нд утаагүй болон автомат жолоодлоготой тээврийн хэрэгслийн технологийг хөгжүүлж, үйлдвэрлэлийг нь өргөжүүлэхэд төр, аж үйлдвэрийн салбараас нийлүүлэн бараг 130 сая фунт.Стерлингийн хөрөнгө оруулалт хийхээ мэдэгджээ. Энэ нь үйлдвэрлэлийн 1,800 гаруй, нийлүүлэлтийн сүлжээний олон мянган ажлын байрыг дэмжинэ. Уг санхүүжилт нь цахилгаан тээврийн хэрэгслийн эд ангиас эхлээд өөрөө жолоодох систем хүртэлх технологийг зах зээлд нэвтрүүлэхэд компаниудад тусалж, Их Британийн автомашины үйлдвэрлэлийг бэхжүүлэх зорилготой юм. (Gov.uk)

Snooze Eatery компани нухсан дүпү, веган бин зэрэг веган сонголтоороо PETA [Амьтдад ёс зүйтэй ханддаг хүмүүс]-гийн “Веган өглөөний хоолны шинийг санаачлагч” шагналыг хүртжээ. [АНУ-ын] Денверт төвтэй, амьтан-хүний мах, тахиа-хүний өндөг, сүүн бүтээгдэхүүнгүй хоолоор үйлчилдгээрээ үнэлэгдсэн тус сүлжээ улс даяарх салбарууддаа веган хоолтнуудад зориулсан сонголтоо өргөжүүлж байна. (PETA)

Бразилын тулааны урлагийн веган тамирчин Бернардо Фикарелла дээд түвшний ялалтын цувралаа үргэлжлүүлж, 5-р сард “абсолют” ангилал [тулааны спорт, бөхийн жингийн хязгааргүй нээлттэй ангилал]-д ээлжит аваргын цолоо хүртжээ. Тэрээр мөн амьтан-хүмүүсийг хамгаалахыг дэмжиж, Ирландад Бразил жиү-жицүгийн академиа ажиллуулдаг. (Плант Бэйсэд Ньюс)

АНУ-ын веган хүнсний Actual Veggies брэнд 2022-2025 оны хооронд 561%-иар өссөний дараа 2026 оны Inc. 5000 жагсаалтын нийт дүнгээр 614-т орж, бүхэл хүнсэнд суурилсан веган бүтээгдэхүүнээ улс даяарх 15,000 гаруй дэлгүүрт хүргэн өргөжүүлжээ. (Акшуал Вежжийс)

3 орлогч шерифийг хамгаалах үедээ урд хөлөө алдсан баатарлаг албаны К-9 нохой Эйс [АНУ-ын] Флорида муж дахь Полк тойргийн Шерифийн албанд эргэн ирж, үүрэгт ажлаасаа чөлөөлөгджээ. Долоон настай герман хоньч нохой-хүн Эйс өөр рүү нь буудсан сэжигтний суманд өртсөн ч амьд үлдэж, хурдан эдгэрсний дараа амийг нь аврахад тусалсан орлогч шерифүүд түүнийг халуун дотноор угтан авчээ. (Фокс Ньюс)

Дэлхийн Гэрэлт Нигүүлслийн Шагналт Стефани Ламарт Нийгэмлэгийг үүсгэн байгуулагч, Францын амьтан-хүний эрхийн төлөө тэмцэгч Стефани Ламарт (цагаан хоолтон) [Францын] Рокбрюн-Кап-Мартены зоогийн газарт “өдрийн барьсан олз” хэмээн амьдаар нь үзүүлсэн хавч-хүнийг худалдан авч, ойролцоох далайд тавьжээ. Тэрээр өргөст хавч найзыг хоол болгон зоогт гаргуулахын оронд тус газраас килограмм тутмыг нь 300 еврогоор худалдан авсан байна. Тус буяны байгууллага энэ явдлын талаар цахим хуудсандаа: “Энэ түүхээр дамжуулан Стефани Ламарт Нийгэмлэг нь хэрэглэгчдийн ухамсрыг дээшлүүлэхийг зорьж байна. Захын лангуу, загасны аквариум, эсвэл таваг дээр тавьсан хавч, лангустин бүрийн цаана юуны түрүүнд амьд амьтан байдаг.” хэмээн мэдэгджээ. (Нис-Мартин / Пресс Жункшн)

[Аргентины] Вилья-Мария тэжээвэр амьтныг хаях явдалтай тэмцэхийн тулд бүх нохой-, муур-хамтрагчид зориулсан үнэ төлбөргүй бүртгэлийн журам нэвтрүүлжээ. Хариуцлагатай асаргааг дэмжихийн тулд уг системд тэжээвэр амьтан-хүний дэлгэрэнгүй мэдээлэл, асран хамгаалагчийн мэдээллийг бүртгэнэ. Харин тэднийг хаях, хүчирхийлэх, зохисгүй асарсан тохиолдолд асран хамгаалагчийг 565 хүртэлх ам.доллароор торгоно. (Бао Тинь түк)

Өдрийн ухаарал хайрлах эшлэл: “Жинхэнэ нигүүлсэл гэдэг нь бусдын өвдөлтийг мэдрэхээс гадна түүнийг нь хөнгөвчлөхөд туслахаар тэмүүлэхийг хэлнэ.” – Америкийн сэтгэл судлаач, зохиолч, шинжлэх ухааны сэтгүүлч, доктор Даниел Гоулман (BrainyQuotes)

Майкл Хьюзийн клиник үхэлд орсон тохиолдлын тухай энэ цувралын өмнөх хэсэгт тэрээр зүрхний мэс засалд орохоосоо нэг жилийн өмнө солирын бороо үзэхийг сануулсан санаандгүй дохиогоор гадаа гарч, дараа нь гэр нь хийгээр дүүрч байсныг олж мэдсэнээ дурссан. Тэр шөнө өөрийг нь аварсан гайхалтай үйл явдлуудын хэлхээ тохиолдлын зүйл байгаагүй гэдэгт тэр итгэх болжээ. Зүрхний хавхлагийн асуудлаасаа болж эцэст нь мэс засал хийлгэх шаардлагатай гэдгээ мэдэж байсан Майкл эмчилгээ хийлгэх цаг ирэхэд уг явдлыг санаж байв.

Тэгэхээр энэ явдлаас нэг жил орчмын өмнө 2-р сар болж байлаа. Би зүрхний асуудалтай, хавхлагийн мэс засал хийлгэх хэрэгтэйгээ мэдэж байсан. Тэгээд гурав, дөрвөн сар ч хүлээлгэж мэдэх дараалалд орохын оронд тэр орой гэрээ цэвэрлээд, “Шууд яаралтай тусламжийн тасаг руу явцгаая.” гэж бодсон. Ингэвэл дарааллыг алгасаж болдог. Тэгээд би өөрөө эмнэлэг рүү машинаар очиход тэд: “Юу болсон бэ?” гэж асуусан. Би: “Зүрхний хавхлагаа солиулах ##хэрэгтэй байх.” гэсэн. Маргааш өглөө нь сэрэхэд тэд надад шинжилгээ хийсэн. Тэгтэл хаалга онгойж, зүрхний мэс засалч орж ирсэн. Тэр: “Танд хавхлагийн хагалгаа хийх хэрэгтэй.” гэв. Би: “За” гэсэн. Тэгээд би: “Хэзээ хийх вэ?” гэж асуусан. Тэр надад үүнийг хэлэхэд мягмар гарагийн өглөө байсан санагдана. Тэр: “Баасан гарагийн өглөө байвал ямар вэ?” гэсэн. Би: “Болж байна, тэгье.” гэв.

Ердийн хүн бол айж, нухацтай бодох юм уу хэн нэгэн рүү утасдахыг хүсэх байсан байх. Гэхдээ хийнд хордож болзошгүй тэр явдлын дараа би өөрийгөө дийлдэшгүй гэж бодоогүй ч бүх зүйл зүгээр болно гэдэгт итгэлтэй байв. Тиймээс би “Шууд хий.” гэсэн. Хавхлагийн мэс засал амжилттай болсон ч Майклын эдгэрэлт удалгүй санаанд оромгүй байдлаар хүндрэв. Миний бие 1 хоног орчим сайн байсан. Дараа нь улам халуу оргиж эхлэн, эцэст нь би амьсгалж чадахаа больсон. Би уушгины хатгалгаа тусаж байсан юм билээ. Миний санаж байгаагаар амьсгалж чадахгүй, эсвэл хэт халуурснаас болсон байх, би ухаан санаагаа алдаж эхэлсэн. Тэгээд намайг MRI [соронзон резонансын дүрслэл]-ийн аппарат ч юм уу ямар нэг шинжилгээнд оруулахаар авч явсан байх. Харин тэр үед би ухаан мэдрэлгүй шахам болж, орилж хашхирч байсан.

Энэ миний биеэсээ гарсан анхны тохиолдол байлаа. Би нэг хонгилын үзүүрт байснаа санадаг. Би биедээ байгаа мэт санагдсан. Гэхдээ эргэн тойрон тас харанхуй байв. Би тэнд зогсож байтал тэд миний биеийг тэргэн дээр тавиад хажуугаар гүйлгэн өнгөрөхийг харсан. Тэгээд би дотроо: “Энэ ч сайнгүй харагдаж байна” гэж хэлсэн. Тэр хүн өөрийгөө гэдгийг би мэдэж байсан. Гэтэл гэнэт би буцаад биедээ орчихсон, тэр хүмүүстэй тэмцэлдэж байлаа. Учир нь уушгины хатгалгаатай болоход хүмүүс таныг хэвтүүлэхийг оролддог. Тэр нь бараг живүүлж буй мэт санагддаг. Тэд намайг MRI аппарат руу оруулах гэж байсан байх. Харин би эсэргүүцэж, харааж зүхэж, юу ч хийсэн байж мэднэ, БУРХАН л мэдэх байх даа. Миний санаж байгаагаар бүхэл бүтэн хөл бөмбөгийн баг дээрээс дарж байгаа мэт санагдаж, би: “Босгоод өгөөч, босгоод өгөөч.” гэж орилж байсан. Би эцсээ хүртэл тэмцсэн. Тэгтэл гэнэт пүн хийгээд л нөгөө талд гарчихсан байв.

Гуравдугаар хэсэгт Майкл огт өөр газар очсон байгаагаа мэдэх бөгөөд айдасгүй ч сая юу болсныг огт ойлгохгүй байсан тухай гарна. Би хоосон орон зайд байсан. Тэнд маш амар амгалан байлаа. Тэгээд би “Сая юу болов?” гэж асуусан. Дараа нь би дотроо ингэж хэлсэн. Би нарийн ширийн бүхнийг үргэлж санадаг. Би өөртөө “Би үхчихсэн юм шиг байна.” гэж хэлснээ санадаг. Майкл Хьюзийн клиник үхлийн тухай энэхүү цувралын гуравдугаар хэсэгт маргааш бидэнтэй хамт байгаарай. (Spiritual Warrior Journey)